Бас министр Бхупендрабхай Пательмен өткен келіссөздер сауда-экономикалық және инвестициялық ынтымақтастықты кеңейту туралы келісіммен аяқталды. Тараптар Алматы — Ахмедабад — Алматы бағыты бойынша тікелей рейстерді іске қосу және Қазақстанда бірлескен фармацевтикалық жобаларды жүзеге асыру мәселелерін де талқылады.
Штат губернаторы Ачарья Деввратпен кездесуде агроөнеркәсіптік кешен саласындағы ынтымақтастық мүмкіндіктері қаралды. Қазақстанның ауыл шаруашылығы өнімдерін жеткізуді арттыру және инвестициялық жобаларды іске асыру мәселелері сөз болды. Қазақстан 2027 жылғы қаңтарда өтетін Vibrant Gujarat Global Summit саммитіне қатысуға шақыру алды.
Adani Group конгломератының өкілдері Қазақстан нарығына шығуға дайын екендіктерін білдірді. Ықтимал инвестициялардың жалпы көлемі 5 млрд долларға бағаланады. Жобалар қатарында инфрақұрылымдық бастамалар, Екібастұзда көмір электр станциясын және заманауи деректер орталығын салу бар.
Елші ICC, FICCI және GCCI іскерлік қауымдастықтарымен кездесулер өткізіп, Қазақстанның инвестициялық мүмкіндіктерін таныстырды. Мәдени бағдарлама Ұлы дала мен Алтын Орда тарихи-мәдени мұрасы туралы баяндайтын Домбыра күніне арналған бейнероликтің көрсетілімімен толықты.
Халқы шамамен 74,3 млн адамды құрайтын Гуджараттың жалпы өңірлік өнімі 2026–2027 қаржы жылында 350 млрд доллар деңгейінде болады деп болжануда, жылдық өсім 10 пайыздан асады. Өнеркәсіп өңірдің ЖӨӨ-нің шамамен 44 пайызын қамтамасыз етеді, негізгі салалары — мұнай-химия, фармацевтика және тоқыма өнеркәсібі. Сурат қаласы әлемдік алмаздардың 90 пайызына дейін өңдейді.